देवानगञ्जमा सरकारविरुद्ध नाराबाजी

सुनसरी,साउन १२।  सुनसरीको देवानगञ्जमा प्रहरीको गोली लागेर एक युवाको मृत्यु भएको घटनापछि उत्पन्न तनाव मंगलबार पनि कायमै रह्यो। निषेधाज्ञा (कर्फ्यु) जारी रहेकै अवस्थामा स्थानीयले सडकमा उत्रिएर प्रदर्शन गर्दै सरकारको भूमिकाप्रति असन्तुष्टि जनाएका छन्। प्रदर्शनकारीले गृहमन्त्री सुधन गुरुङविरुद्ध नाराबाजी गर्दै घटनाको निष्पक्ष छानबिन र दोषीमाथि कारबाहीको माग गरेका छन्।

प्रदर्शनकारीहरूले घटनापछि प्रभावित क्षेत्रमा शान्ति स्थापना र अवस्था सामान्य बनाउन सरकार प्रभावकारी रूपमा सक्रिय नभएको आरोप लगाएका छन्। उनीहरूले स्थानीय प्रशासनले समयमै आवश्यक पहल नगर्दा तनाव अझ बढेको दाबी गरेका छन्।

देवानगञ्ज गाउँपालिकाका अध्यक्ष वेचन मेहताले पनि गृह मन्त्रालय र जिल्ला प्रशासन कार्यालय सुनसरीले घटनालगत्तै देखाउनुपर्ने सक्रियता नदेखाएको आरोप लगाए। उनका अनुसार सरुवा भएका प्रमुख जिल्ला अधिकारी बासुदेव घिमिरेले घटनापछि प्रभावकारी समन्वय गर्न नसकेको र नयाँ प्रमुख जिल्ला अधिकारी ईश्वरीप्रसाद अर्यालले पनि दुवै पक्षबीच संवाद गराएर समस्या समाधानतर्फ आवश्यक पहल नगरेको बताए।

अध्यक्ष मेहताले मंगलबार बिहान नयाँ प्रमुख जिल्ला अधिकारीसँग टेलिफोनमार्फत छलफल गरी अवस्था सहज बनाउन आग्रह गरेको जानकारी दिँदै त्यसपछि पनि अपेक्षित प्रतिक्रिया नआएको गुनासो गरे।

उनले गाउँपालिकाको पहलमा स्थानीय राजनीतिक दल, जनप्रतिनिधि तथा सरोकारवालासँग छलफल गरी सामाजिक सद्भाव कायम गर्ने र वार्तामार्फत समस्या समाधानको वातावरण बनाउन प्रयास भइरहेको बताए।

गत आइतबार राति दुई युवा समूहबीच भएको विवाद हिंसात्मक बन्दा स्थिति नियन्त्रणमा लिन प्रहरीले चलाएको गोली लागेर देवानगञ्ज गाउँपालिका–४ का २५ वर्षीय ओमप्रकाश मेहताको मृत्यु भएको थियो। घटनामा कम्तीमा २१ जना घाइते भएका छन्। घाइतेमध्ये दुई जनाको अवस्था गम्भीर रहेको जनाइएको छ।

घटनापछि प्रशासनले क्षेत्रमा निषेधाज्ञा जारी गरेको भए पनि मंगलबार दिनभर प्रदर्शनकारीले कर्फ्यु उल्लंघन गर्दै विभिन्न स्थानमा प्रदर्शन गरेका थिए। घटनास्थल र आसपासका क्षेत्रमा सुरक्षाकर्मीको उपस्थिति बाक्लो बनाइए पनि अवस्था पूर्ण रूपमा सामान्य हुन सकेको छैन।