किसानलाई ५० प्रतिशत अनुदानमा कृषि उपकरण वितरण

राप्तीसोनारी, असार १७  राप्तीसोनारी गाउँपालिकाले कृषि उत्पादन वृद्धि, खेतीपातीलाई यान्त्रिकीकरण गर्दै किसानको उत्पादन लागत घटाउने उद्देश्यले ५० प्रतिशत अनुदानमा विभिन्न कृषि उपकरण तथा साना सिँचाइका सामग्री कृषकलाई हस्तान्तरण गरेको छ ।

गाउँपालिकाको वार्षिक स्वीकृत कार्यक्रमअन्तर्गत सञ्चालन गरिएको ’किसानसँग पालिका प्रमुख कार्यक्रम’ मार्फत कृषकलाई १० हार्सपावर क्षमताको मिनी टिलर तथा ६ फिटको रोटाभेटर ५० प्रतिशत अनुदानमा वितरण गरिएको हो । त्यस्तै पूर्वाधार विकास कार्यक्रम (साना सिँचाइ) अन्तर्गत २ इन्चको बोरिङ सेट (४० फिट ठोकुवा पाइप) र १.५ हार्सपावर क्षमताको २ इन्च मोटरसमेत ५० प्रतिशत अनुदानमा हस्तान्तरण गरिएको गाउँपालिकाले जनाएको छ ।

उपकरण हस्तान्तरण कार्यक्रममा गाउँपालिका अध्यक्ष तप्तबहादुर पौडेलले कृषिलाई आधुनिक र व्यवसायिक बनाउने लक्ष्यका साथ पालिकाले किसानमैत्री कार्यक्रम सञ्चालन गरिरहेको बताए । उनले खेतीमा श्रमको अभाव बढ्दै गएको अवस्थामा यान्त्रिकीकरण नै उत्पादन वृद्धि र लागत न्यूनीकरणको प्रभावकारी उपाय भएको उल्लेख गरे । ‘किसानलाई उत्पादनमुखी बनाउन र खेतीलाई प्रतिस्पर्धी बनाउन यस्ता कार्यक्रमलाई आगामी वर्षहरूमा पनि निरन्तरता दिइनेछ,’ उनले भने । उपाध्यक्ष मनिषा सिंह थारुले कृषि क्षेत्र गाउँपालिकाको प्रमुख आर्थिक आधार भएकाले किसानको आवश्यकता अनुसार अनुदानका कार्यक्रम सञ्चालन गरिएको बताइन् । उनले आधुनिक उपकरणको प्रयोगले समयको बचत, उत्पादन वृद्धि तथा कृषिप्रति युवाको आकर्षणसमेत बढ्ने विश्वास व्यक्त गरिन् ।

प्रमुख प्रशासकीय अधिकृत मणिराम खरेलले गाउँपालिकाले वितरण गरिएका उपकरणको सदुपयोग गर्न कृषकलाई आग्रह गर्दै अनुदानको उद्देश्य उत्पादन वृद्धि र किसानको आयआर्जन बढाउनु रहेको बताए । उनले कृषि क्षेत्रमा गरिएको लगानीको प्रतिफल देखिने गरी उपकरणको सही प्रयोग गर्नुपर्नेमा जोड दिए । कार्यक्रममा कृषि शाखा प्रमुख महेन्द्र खड्काले पालिकाको कृषि यान्त्रिकीकरण अभियानलाई चरणबद्ध रूपमा विस्तार गर्दै लगिएको जानकारी दिए । उनका अनुसार खेतीयोग्य जमिनको अधिकतम उपयोग, श्रम अभावको व्यवस्थापन र उत्पादन लागत घटाउने लक्ष्यअनुसार यस्ता कार्यक्रम सञ्चालन भइरहेका छन् । आगामी दिनमा पनि किसानको माग र आवश्यकतालाई प्राथमिकतामा राखेर कृषि प्रवद्र्धनका कार्यक्रम अघि बढाइने उनले बताए ।

मिनी टिलर प्राप्त गरेका कृषक झगरुप्रसाद थारुले अनुदान कार्यक्रमले आफूजस्ता किसानलाई ठूलो राहत पुगेको बताए । ‘पहिले जोताइका लागि अरूको भर पर्नुपर्थ्यो । समयमै खेत तयार गर्न समस्या हुन्थ्यो । अब आफ्नै मिनी टिलर भएपछि खेती गर्न सहज हुने र लागत पनि घट्ने अपेक्षा गरेका छौँ,’ उनले भने । त्यस्तै रोटाभेटर प्राप्त गरेका कृषक रुद्रबहादुर भण्डारीले गाउँपालिकाको सहयोगले आधुनिक कृषि उपकरण प्रयोग गर्ने अवसर पाएको बताए । ‘रोटाभेटरले खेत छिटो तयार गर्न, इन्धन र समय बचत गर्न तथा उत्पादन बढाउन सहयोग पुग्ने विश्वास छ । यस्तो कार्यक्रमले किसानलाई व्यवसायिक खेतीतर्फ अझ प्रोत्साहन मिलेको छ,’ उनले प्रतिक्रिया दिए ।

कार्यक्रममा गाउँपालिकाका जनप्रतिनिधि, कर्मचारी तथा लाभग्राही कृषकहरूको उल्लेखनीय सहभागिता रहेको थियो । गाउँपालिकाले कृषि उत्पादन वृद्धि, सिँचाइ सुविधा विस्तार तथा आधुनिक कृषि प्रविधिको प्रयोगमार्फत कृषकको आयस्तर उकास्ने उद्देश्यले आगामी दिनमा पनि यस्ता कार्यक्रमलाई निरन्तरता दिने जनाएको छ ।