सामाजिक यथार्थको कठोर चित्र ‘लालीबजार’ले उठायो चेलीबेटीको पीडा‘

नेपालगन्ज, जेठ २४  नेपाली चलचित्रमा मनोरञ्जनभन्दा माथि उठेर समाजका लुकेका घाउहरूलाई पर्दामा उतार्ने प्रयास कमै हुने गरेको छ । यस्तै प्रयासका रूपमा आएको चलचित्र ‘लालीबजार’ ले महिलामाथि हुने विभेद, गरिबी, सामाजिक अन्याय र संघर्षको कथा मार्मिक ढंगले प्रस्तुत गर्दै दर्शकलाई गम्भीर रूपमा सोच्न बाध्य बनाएको छ ।

पश्चिम नेपालको ग्रामीण परिवेश र सीमान्तकृत समुदायको जीवनलाई आधार बनाइएको चलचित्रले परम्परा र संस्कृतिका नाममा महिलाले भोग्दै आएको पीडा तथा असमानतालाई केन्द्रमा राखेको छ । बाँच्नका लागि एक युवतीले सामना गर्नुपर्ने चुनौती, संघर्ष र सामाजिक दबाबलाई कथाको मूल विषय बनाइएको छ । चलचित्रमा अभिनेत्री स्वस्तिमा खड्का मुख्य भूमिकामा देखिएकी छन् । उनले निर्वाह गरेको पात्रमार्फत विद्रोह, आत्मसम्मान, ममता र पीडाका अनेक आयाम जीवन्त रूपमा अभिव्यक्त भएका छन् । कलाकार रविन्द्र सिंह बानियाँ, विशाल देवकोटा, समिरा थापा र मुकुन्द श्रेष्ठ ले पनि आफ्नो भूमिकालाई प्रभावकारी बनाएका छन् ।

चलचित्रका लेखक यम थापा ले समाजको यथार्थ पक्षलाई कथामा उतार्ने प्रयास गरेका छन् भने निर्माता रविन्द्र सिंह बानियाँ र दीपेश खत्रीले त्यसलाई पर्दामा सशक्त रूपमा प्रस्तुत गरेका छन् । ‘लालीबजार’को बलियो पक्ष यसको यथार्थपरक प्रस्तुति हो । ग्रामीण जीवनका दुःख, आर्थिक अभाव र महिलाको मौन संघर्षलाई चलचित्रले कृत्रिमता बिना प्रस्तुत गरेको अनुभूति हुन्छ । चलचित्रको छायांकन, पृष्ठभूमि र संगीतले कथाको भावनात्मक प्रभावलाई अझ गहिरो बनाएको छ । यद्यपि चलचित्र पूर्ण रूपमा त्रुटिरहित भने देखिँदैन । केही दृश्य अपेक्षाभन्दा लामो लाग्छन् भने कतिपय प्रसंगमा अत्यधिक भावुकता प्रस्तुत हुँदा कथाको स्वाभाविकता केही कमजोर भएको महसुस हुन्छ । सामाजिक विषयहरू धेरै समेट्ने प्रयासका कारण मुख्य कथाको केन्द्रबिन्दु केही स्थानमा फितलो बनेको अनुभूति पनि हुन्छ ।

यी सीमित कमजोरीका बाबजुद ‘लालीबजार’ले नेपाली समाजभित्र लुकेका पीडा र अन्यायलाई उजागर गर्ने साहसी प्रयास गरेको छ । चलचित्रले सिनेमा केवल मनोरञ्जनको माध्यम मात्र नभई सामाजिक चेतना जगाउने शक्तिशाली साधन पनि हुन सक्छ भन्ने सन्देश दिएको छ । व्यापारिक सूत्रमा आधारित चलचित्रहरूको भीडबीच ‘लालीबजार’ले फरक विषयवस्तु रोज्दै नेपाली चलचित्र उद्योगलाई नयाँ दिशा देखाउने प्रयास गरेको छ । यसले दर्शकलाई एउटा कथा सुनाउनुका साथै समाजको कठोर यथार्थसँग प्रत्यक्ष साक्षात्कार गराउने काम गरेको छ ।