राप्तीसोनारीमा ३७ करोड बढी रुपैयाँमा पूर्वाधार निर्माण हुँदै

राप्तीसोनारी । स्थानीय जनताको आवश्यकता र चाहनालाई प्राथमिकतामा राख्दै राप्तीसोनारी गाउँपालिकाले पूर्वाधार विकासका कार्यक्रमहरूमा उल्लेख्य लगानी गर्दै आएको छ । चालु आर्थिक वर्ष २०८२/८३ का लागि गाउँपालिकाले ९ वटै वडामा सन्तुलित विकास सुनिश्चित गर्न ३७ करोड ८ लाख बराबरको बजेट विनियोजन गरेको छ ।
यस बजेट विनियोजनबाट सबै समुदायका आधारभूत आवश्यकता पूरा हुने अपेक्षा लिइएको गाउँपालिका अध्यक्ष तप्तबहादुर पौडेल बताउँछन् । ‘पूर्वाधार विकास कुनै पनि समृद्धिको आधार हो । हामीले सबै वडामा सन्तुलित र सहभागी आधारित विकासलाई प्राथमिकता दिएका छौं,’ अध्यक्ष पौडेल भन्छन्, ‘जनताको आवश्यकता र सल्लाहलाई प्राथमिकतामा राखेर योजना छनोट गरिएको छ ।’ गाउँपालिकाले योजना निर्माणको क्रममा स्थानीय जनताको प्रत्यक्ष सहभागिता सुनिश्चित गर्दै आएको छ । यसले योजनामा जनताको अपनत्व बढाउनुका साथै कार्यान्वयनमा सहजता ल्याएको अध्यक्ष पौडेलको भनाइ छ । ‘जनताको साथ र सहभागिताबाट मात्रै विकास दिगो र प्रभावकारी हुन्छ,’ उनी थप्छन् ।
विकास निर्माणको काममा जनसहभागिताले पार्ने असरबारे अध्यक्ष पौडेल स्पष्ट छन् । उनका अनुसार, स्थानीय तहको विकासको सफलता त्यस क्षेत्रमा बसोबास गर्ने नागरिकको सक्रिय संलग्नतामा निर्भर रहन्छ । ‘हामीले विगतका योजनाहरूमा देखेको अनुभवले जनप्रतिनिधि मात्रले हैन, जनताले साथ दिए मात्र परिणामसहितको विकास सम्भव छ भन्ने कुरा पुष्टि भएको छ,’ अध्यक्ष पौडेल भन्छन् ।
गाउँपालिकाले हालसम्मको कार्यकालमा सडक, नाला, खानेपानी, विद्यालय भवन, स्वास्थ्य चौकी, कृषि सिँचाइ र सार्वजनिक संरचनाहरूको निर्माणमा विशेष ध्यान दिएको छ । चालु वर्षमा पनि यी क्षेत्रहरूलाई प्राथमिकता दिइने गाउँपालिकाको नीति तथा कार्यक्रममा उल्लेख गरिएको छ । अध्यक्ष पौडेलका अनुसार, आगामी योजनाहरू अझै समुदायमैत्री बनाउने गरी प्रारम्भिक सर्वेक्षण, सार्वजनिक सुनुवाई र समन्वयात्मक संयन्त्रमार्फत अघि बढाइनेछ ।
साथै, बजेट कार्यान्वयनका क्रममा पारदर्शिता कायम राख्न गाउँपालिकाले प्रत्येक योजनाको विवरण सार्वजनिक गर्ने, जिम्मेवार निकायलाई स्पष्ट तोक्ने र समय–समयमा अनुगमन गर्ने व्यवस्था गरेको छ । ‘हामी योजना पारदर्शी बनाउँछौं । सार्वजनिक सुनुवाई र समीक्षा हाम्रो नियमित अभ्यास हो,’ अध्यक्ष पौडेलको भनाइ छ । पूर्वाधार निर्माणले दीर्घकालीन प्रभाव पार्ने भएकाले त्यसको गुणस्तरमा पनि विशेष ध्यान दिइएको छ । प्रविधिको प्रयोग, दक्ष जनशक्तिको परिचालन र जनशक्ति अभावका समस्या समाधान गर्ने उपायहरू पनि तय गरिँदैछ ।
सामुदायिक पहुँच, समावेशिता र समन्वयमार्फत स्थानीय तहमा विकासको सशक्त रुप देखिएको राप्तीसोनारी गाउँपालिकाको योजनागत सोचबाट स्पष्ट हुन्छ । जनताको आवश्यकताको मूल्यांकन, तिनको चासोलाई सम्बोधन गर्ने योजना छनोट, सहभागीता र पारदर्शिता—यी सबै पक्षको समायोजनले राप्तीसोनारीलाई दिगो विकासतर्फ उन्मुख गराएको देखिन्छ ।
‘हामी पूर्वाधार विकासलाई मात्र भौतिक संरचना निर्माणको रूपमा हैन, सामाजिक न्याय, समावेशी विकास र दिगोपनाको आधारको रूपमा लिन्छौं,’ अध्यक्ष पौडेल निष्कर्षमा भन्छन् । यसरी, राप्तीसोनारी गाउँपालिकाले पूर्वाधार विकासमार्फत न केवल संरचनागत सुधारको दिशा लिएको छ, तर त्यसका माध्यमबाट जनजीवनमा प्रत्यक्ष सुधार ल्याउने लक्ष्य समेत लिएको छ ।